Karon nga nag sugod nga ang lokal nga kampanya kag indi mapunggan ang pag daguso sang mga supporter kag mga mass gathering, Commission on Elections naga pahanumdom sa publiko nga yara sa gihapon ang Covid-19.
Sa resolution nga ginpa gwa sang Comelec bahin sa in-person campaigning, indi na kinahanglan pa sang mga kandidato nga magkuha sang permit gikan sa Comelec Campaign Committee sa pagpatigayon nila sang kampanya, caravan, motorcade ukon public rallies sa mga lugar sa idalom sang Alert Level 1 kag Alert Level 2.
Ang Bacolod City yara sa Alert Level 1 kag ang Negros Occidental naman sa Alert Level 2.
Suno kay Acting Provincial Elections Supervisor, Roberto Salazar sa mga public rallies kinahanglan na lamang nga magpahibalo sa election officer sang natungdan nga lugar.
May paghalog man sa mga rekisitos suno kay Salazar naga pabilin ang patakaran sa in-person campaigning.
Indi gihapon pwede ang handshaking ukon pag pangamusta, beso-beso, ukon magsulod sa balay balay. Sa sahi sang pagpatigayon sang kampanya, indi malikawan suno kay Salazar nga tuman ka exposed sang mga kandidato.
Ang patakaran sang Comelec suno sa iya gindihon para mapangapinan ang ikaayong lawas kag malikawan ang liwat nga pagtimbuok sang mga kaso.
Pahanumdom naman sa mga kandidato, likawan ang below the belt nga kampanya kag ipabilin ang matawhay kag malinong nga eleksyon.