Sa pihak sang pagpamatuk sang pila ka mga kandidato sa tuyo nga pag-deputize sang mga barangay kapitan nga mag-monitor sang election campaign activities sa ila nasakpan, magapadayon gihapon ang Commission on Elections sa pag-seminar sang mga lideres sang barangay agud mabuligan sila karon nga nagsugod na ang election campaign period.
Suno kay acting election officer Atty. Revo Sorbito sang Comelec-Bacolod, dako ang mabulig sang mga barangay officials ilabi na sa pagbantay sa mga illegal campaign materials kag sa pagpasiguro nga napatuman ang mga minimum health protocol sa tion nga magsugod na ang local campaign period sa Marso 25.
Dugang ni Sorbito nga may mga legal remedy man nga sarang mahimu ang mga kandidato antes pa man sang natalana nga pag-deputize nila sang mga barangay kapitanes.
Si Bacolod City mayoralty aspirant Alfredo Benitez isa sa mga nagpamatuk sa lihok sa pagpati nga may mga political biases ang mga kapitan.
Nagpahayag man ang pamunuan sang Comelec-Bacolod nga handa sila nga aksyunan ang kasubong nga akusasyon kun may mapamatud-an.