Comelec Bacolod wala ginatugutan ang reservation sa linya para sa mga nagaparehistro. Indi naman makadugang pa sang sattellite registration antes sang deadline sa Hulyo 23.
May masobra na sa 3600 ka mga voter applicants ang na accomodate sang Comelec Bacolod humalin sang nagsugod ang voters registration sang Hulyo 4 para sa ginapaabot nga Barangay kag Sangguniang Kabataan elections.
Siyam na lang ka adlaw ang nabilin antes magtakop ang voters registration gani makita ang tuman ka laba nga linya sang mga voters applicants.
Suno kay Atty. Kathrina Trinio Cana, election officer sang Bacolod, masami may nagalinya nga wala sang requirements gani wala nila ini ginatagaan sang priority numbers.
Wala man sang reservation kag lunsay mga pwd kag senior citizens ang ginakabig VIP ukon may priority sa registration.
Si Mayor Albee Benitez ang nagpahayag nga handa ang siudad para magtalana sang sattellite office para madugangan sang Comelec ang mga registration sites.
Pero indi masarangan sang Comelec ang simultaneous nga voters registration bangud man sang availability sang equipment.