Protected Area Management Board sang Mt Kanlaon Natural Park ang maga hinyo sang clearance gikan sa tiglikum sang Department of Environment and Natural Resources agudto ma dredge ang mga suba kag sapa sakop sang protected area sang Kanlaon nga apektado sang mga nagtig-a nga lahar.
Suno Kay Assistant Regional Director for Technical Services sang DENR NIR, Joan Nathaniel Gerangaya, kinahanglan nga mahawanan gikan sa nagtig-a nga lahar ang kasapaan kag kasubaan bangud sarang mag tuga sang pagbaha nga maga apekto sa malapit nga komunidad ang barado nga waterways.
Delikado ang sitwasyon. Ini ang gintalakay sa pagsinapol sang Lunes upod sa PAMB kag mga opisyales sang DENR NIR.
“Delikado ni siya, kun mag baskog ang ulan, kay puno na ang waterways, siyempre mangita sang lowest point. Basi magkadto sa mga balay nga ara da sa higad sang Mt Kanlaon”, suno kay Gerangaya.
Madamo sang suba kag sapa suno kay Gerangaya ang kinahanglan ma-dredge kag nag-request pa sila sa Mines and Geosciences Bureau sa pag assess sang volume.
Sa iban nga suba, ang mga nagtig-a nga lahar halos magtupong na sa riverbank suno sa iya.
Sakop sa area sang La Castellana kag La Carlota City ang ini nga mga suba kag sapa.
Yara naman sa idalom sang Office of the Governor ang pag approve sang dredging request.
Ugaling, ang mga suba kag sapa nga iga-dredge nga sakop sang protected area sang MKNP ang naga kinahanglan sang clearance gikan sa DENR Secretary antes mapatigayon ang amo nga tikang, rason nga nag dihon ang PAMB sang resolution para inihinyo ini suno kay Gerangaya.
“Ang PAMB na lang ang mag pass sang resolution, requesting the DENR Secretary to allow nga ining mga dredged materials
halin sa aton nga mga napuno nga creeks and river, kuhaon sang LGU kag idal-on sagwa, kun diin may kinahanglanon
lang bala sang filling materials”, suno kay Gerangaya.