Chinese national kag 8 ka iban pa gin-aresto sa Hinoba-an bangud sang illegal mining

Gindakup sang katapo sang Criminal Investigation and Detection Group upod ang partner agencies sa idalum sang Oplan Kalikasan ang walo ka mga Pinoy kag isa ka Chinese national bangud sang illegal mining sa Zone 10, Barangay Bacuyangan, banwa sang Hinoba-an, Negros Occidental.

Nakumpiskar sa lugar ang mga heavy equipment lakip na ang duha ka mga backhoes, tatlo ka 10-wheeler dump trucks, vibrating screen machine, duha ka box nga may unod nga mga botelya sang mercury, kag isa ka automatic generator set control panel, tanan nagabalor sang P17.5 Million.

Base sa report, may narekober man nga 52 ka bala sang caliber 5.56 mm, 23 ka bala sang caliber .45, isa ka firearm case, kag isa ka Toyota Hilux nga salakyan.

Ginpatigayon ang operasyon bangud sang reklamo nga may yara sang indi otorisado nga pagkuha sang mineral resources sa lugar.

Sanday Negros Occidental Governor Eugenio Jose Lacson kag Hinoba-an Mayor Daph Anthony Reliquias, sa separado nga statements, ang nagapanindugan nga sa gihapon, nagapamatok sila sa illegal mining.

Suno kay Lacson, nagapabilin ang probinsya nga malig-on sa ila saad nga pangapinan ang dunang manggad kag istrikto nga masunod ang mga environmental laws kag regulatory processes nga wala sang may ginapili.

Samtang, nagpaathag si Mayor Reliquias nga matapos makabaton sang reklamo gikan sa mga mangunguma, sila ang gilayon nga nagpatigayon sang imbestigasyon. Sang nakumpirmar na ang initial findings, ila ini gin-endorse sa PEMO kag nag-coordinate sa mga national regulatory kag law enforcement agencies, lakip na ang Mines and Geosciences Bureau kag Department of Environment and National Resources.*

[sibwp_form id=1]