Sumugod sa madason nga semana mas temprano na nga pagasuguran sang Central Negros Electric Cooperative ang ila preventive maintenance agud nga indi na maglawig sa isa ka adlaw ang scheduled nga mga brownout.
Ini ang ginpahayag sang project supervisor kag acting general manager sang CENECO nga si Atty. Danny Pondevilla.
Suno sa iya, may yara sang mga ti-on nga nagalawig sa halos isa ka adlaw ang scheduled brownout bangud sang ginapatigayon nga preventive maintenance sang CENECO sa ila nga mga poste.
Luyag niya nga kaagahon pa lamang suguran na ang trabaho sang ila mga lineman samtang nagakatulog pa ang kadam-an sang mga pumuluyo agud nga malip-ot na lamang nga mga inoras sa aga ang brownout.
“Indi mo ni malikawan ang maintenance nga dapat ma brownout ka for the safety man sang aton nga empleyado sa noneco ang ang ginahimo ko pa ubrahon ko ang empleyado kaagahon masugod kamo alas kwatro sang kaagahon tapusa alas otso sang aga para pagbugtaw sang tawo may power na,” suno kay Pondevilla.
Ginatun-an man karon sang CENECO ang looping sang mga linya sini agud nga makahulam sang kuryente gikan sa iban nga linya para indi tuman kadamo sang panimalay ang maapektuhan sang scheduled brownout.
Si Pondevilla ang general manager man sa karon sang Northern Negros Electric Cooperative ukon NONECO.
Siya ang ginbutang sa CENECO sang National Electrification Administration bangud on leave ang manager sini nga si Sulpicio Lagarde.