Indi na pwede mahabuyan sang basura ang cell number 4 sang Sanitary Landfill sa Barangay Felisa, Bacolod City bangud naga-awas na.
Ini ang ginpahayag ni City Administrator Atty. Mark Steven Mayo, nga nagaserbe man sa karun bilang officer-in-charge sang Bacolod Environment and Natural Resources Office ukon BENRO.
Suno kay Mayo, ang kadamuon sang basura nga yara sa karun sa cell number 4 ang nagalapaw na sa projected capacity sini.
Tubtob sa karun wala pa sang Environmental Compliance Certificate ukon ECC ang amo nga cell bangud may mga kulang pa ini nga mga dokumento.
Ginklaro ni Mayo nga na delay ang pag proseso sang ECC bangud wala pa makuhaan sang land use conversion ang duta nga ginatindugan sang nasambit nga cell.
Sandig sa projected life span sang cell number 4, sang Disyembre pa sang tinalikdan nga tuig ini dapat na sirado, apang tubtob sa karun bukas pa gihapon.
Tubtob nga wala pa sang ECC ang cell number 4, indi paman masugudan ang pagproseso sang ECC sang cell number 5, kag indi pa man magamit.
Sa Agosto 20, magapatigayon ang Environmental Management Bureau Negros Island Region sang isa ka public hearing sa Bacolod City Government Lobby para sa pag grant sang ECC sang cell number 4.
[sibwp_form id=1]