Nagsugod na subong nga adlaw ang Business One Stop Shop sang siudad sang Bacolod para sa pagkuha kag pagpa renew sang business permit.
Sa nahauna nga ti-on ginpahamtang ang one stop shop sang siudad sa sulod sang Ayala Capitol Central Mall para mangin mahapos para sa pumuluyo sa pag-process sang ila mga permit kag mapatuman ang minimum health protocols.
Ini bangud sang ginapatuman nga “No appointment, No transaction” policy kun sa diin ang luyag magpa renew ang dapat anay mag set sang appointment sa business permits and licensing office antes makapa renew.
Ini ang mahimo online ukon magkadto sa ila opisina sa Bacolod City Government Center.
Ang Business One Stop Shop ang magabukas humalin las nuebe sang aga tubtub las singko sang hapon kada Lunes tubtub Biyernes.
Magalawig ini sa sulod sang duha ka bulan gani ginahaylo sang siudad ang mga negosyante nga temprano nga magpa rehistro ukon magpa renew sang ila nga mga permit agud nga indi mamultahan.
May yara man sang ten percent nga discount ang mga magabayad sang advance sang ila regulatory fees para sa bilog nga tuig antes sang Marso 31.