Nakibot kaina sang aga si Elisa Catacata ukon mas kilala nga Chay Neneng sang may babaye nga nag palapit sa iya kag nagduhol sang isa ka libo ka pesos.
Ang amo nga persona nga wala na nagpakilala ang nag duhol sa iya sang isa ka libo ka pesos matapos nga makit-an sa Facebook ang balita nga ginkawatan siya sang itlog.
Masami siya nagakalabyan sang amo nga persona sa Burgos Market gani gintagaan siya sang kwarta nga iya naman ginpang bayad sa mga nahulman niya sang kwarta.
May netizen man nga naka base sa Estados Unidos nga naka kita sang balita parte sa natabo sa iya kag nakig angut sa Digicast Negros.
Nag ayo siya nga tagaan si Chay Neneng sang mil kinyentos pesos.
Si Chay Neneng wala mag pensar nga may mabulig pa sa iya halin sa US. Emosyonal siya nga ginbaton ang kwarta.
Sini gid lamang nga hapon gindala sa Police Station 4 sa pagpamuno ni Police Major Richie Gohee ang suspek nga ginkilala kay Cloves Elbanbuena, 57 anyos sang Barangay 31. Gin ako niya nga siya ang nagkawat sang itlog.
Gilayon siya nga nag luhod kag nagpangayo sang pasensya sa kay Chay Neneng.
Suno sa iya ginsugo lang siya mangawat. Wala niya man ginsabat kun gin ano niya ang itlog.
Si Chay Neneng desidido nga mag pasaka sang kaso batuk sa iya para wala na sang may mabiktima pa nga iban.
Wala man niya mabawi ang itlog pero nalipay si Chay Neneng nga may mga nagpadala sang bulig sa iya kag tigayon nga nakilala kag nadala sa police station ang suspetsado.