June 2023 ang target nga maka patigayon sang bidding para sa bulk water project nga gina kabig sang gobyerno probinsyal nga flagship project.
Ginsakdag kaina ang pinaka una nga meeting sang Technical Working Group upod ang core group para sa public private partnership ukon PPP projects kaupod ang partners sa PPP Center kag mga consultant.
Suno kay Provincial Administrator Rayfrando Diaz samtang naga trabaho sila para sa Malogo-Imbang nga bulk water project nga naga lakip sang feasibility study, dala naman diri ang pag train man sang PPP core group kag katapo sang TWG para sa mga gina paabot pa gid nga PPP projects.
Labing tinutuyo sang bulk water project nga tigayon masabat ang kakulang sang tubig sa probinsya kasubong man ang pag access sang matinlo nga tubig.
Ang problema sa cholera kag iban pa gid nga water borne diseases isa lamang sa gina atubang sa karon nga pag panghangkat sang probinsya . Surface water tigaylo sang ground water suno kay Diaz amo ang tuyo nga ma tap.
“Tilawan naton nga ang surface water amo na aton i-purify kag amo na aton i-supply sa aton mga LGUs kag sa mga water districts naton. So damo sya nga aspeto ang gina igo niya. Environmental, health, social and we want also to help people nga ang problem sa tubig indi na mag recur, especially sa Bacolod kay damo na di under supply. Damo man wala supply gid”, suno kay Diaz.
Sa Imbang sa Talisay City, sarang makakuha sang 40 million liters per day (MLD). Daku man ang kapasidad sang Malago sa Victorias City suno kay Diaz.
Ang USAID ang naga suporta sang development sang surface water bulk suppy. Paagi sa Safe Water Project, gina estimate sang USAID nga mga 64 MLD nga water supply nga ginakinahanglan sang mga komunidad gikan sa Talisay, Silay, EB Magalona, Victoiras kag Manapla ang sarang mapun-an sang bulk water supply gikan sa Malogo River.
Ginsiling man ni Diaz nga masabat man sang bulk water project ang pila ka mga environmental kag social issues. Sa karon ang water district sang Talisay, Silay kag Bacolod ang nagpadala sang sulat nga naga pabutyag sang ila nga interest sa pag subcribe para sa bulk water. Ang kulang lamang sang Bacolod amo ang pag pat-od sang ginakinahanglan nga kantidad sang tubig.