Magasugod na sa Miyerkules, Nobyembre 11 ang pag-deliberate sang proposed 2027 annual budget sang Bacolod City nga 5.3 billion pesos.
Ini ang pangunahan ni Councilor Jude Thaddeus Sayson nga pamuno sang Committee on Finance sang Sangguniang Panlungsod.
Suno sa iya, sa una nga adlaw, iya ginpatawag ang budget officer, treasurer, kag accountant sang siudad agud mapaathag kag ma depensahan kun ngaa nagdangat sa 650 million pesos ang increase sang proposed budget kun ikumpara sa budget sang siudad sini nga tuig.
Ini ang suno sa iya, pinakamataas nga increase sa budget sa maragtas sang Bacolod City bangud yara lang sa 300 million pesos ang pinakadako nga increase nga na rekord sang siudad.
Sumugod sa amo nga adlaw, mangin adlaw adlaw na ang deliberation sang komitiba suno kay Sayson agud ma aprubahan na ang budget antes ang Disyembre 15.
Una na nga ginsiling ni Sayson nga ang Department of Social Services and Development ang may pinakadako nga allocation sang budget para sa 2027. Lakip na diri ang mga ayuda kag assistance nga ginapanghatag sa mga labing kubos.
[sibwp_form id=1]