Trending sa social media ang panawagan nga ipaandaron ang traffic lights kag indi pag ibilin sa traffic enforcers.
Ang Bacolod Traffic nagpaathag kun ngaa ginapatay ang traffic lights sa subong nga holiday rush.
Ginpahayag ni Atty. Reuben Mikhail Sabig, head sang Bacolod Traffic and Transport Management Department ukon BTTMD nga ginpatay anay ang pila ka mga traffic lights sa nagkalain-lain nga intersection sa Bacolod City subong nga holiday season.
Suno sa iya, indi nagakaangay paandaron ang traffic lights sa tion nga madamo gid sang salakyan, bangud indi pa “smart” ang traffic light system sang siudad.
Apang suno kay Sabig, may ginpatuman naman ang BTTMD nga adjustment sa oras sang pagpaandar sang pila ka mga traffic lights agud mabuligan ang dalagan sang trapiko.
Ginsiling man ni Sabig nga ginapaabot na sang ila departamento ang pagdamo sang salakyan subong nga holiday season, ilabi na sa mga dalan pakadto sa mga mall, gani nagapangita sila sang dugang nga paagi agud mapaayo ang sitwasyon sang trapiko.
Suno sa BTTMD, may pila ka mga traffic enforcer gikan sa first shift ang ginbalhin sa second shift agud makabulig sa pagdumala sang trapiko sa sinakuay nga oras.*