BTTMD nagpaathag nga ang motorsiko kag tricycle indi pwede sa flyover. Ini kasunod sang viral video sang motorcycle rider nga naga overtake samtang yara sa flyover.
Suno kay Bacolod Traffic and Transport Management Department ukon BTTMD Head Atty. Reuben Sabig, isa ka driver sang motorsiklo ang nag viral sa social media matapos nag-overtake sa Magsaysay Flyover sa Barangay Singcang Airport.
Suno kay Atty. Sabig, ginadumilian ang paglabay sang mga motorsiklo kag tricycle sa flyover bangud ini para lamang sa mga salakyan nga 4-wheel ukon masobra pa. Dugang pa niya, may yara sang nagkalain-lain nga traffic sign sa siudad nga dapat sundon, kag ang mga magalapas sini ang magapang-atubang sang kaso.
Panugyan pa sang BTTMD sa mga driver sang motorsiklo nga indi na maghulat nga madakpan ukon masaway antes magsunod sa layi, bangud klaro man ang mga traffic sign nga ginbutang sa mga dalanon.
Ginapahanumdom pa ni Atty. Sabig nga ang pagsunod sa mga layi sa trapiko importante para sa seguridad indi lamang sang mga motorista kundi pati na sang mga pedestrian.*