Site icon Digicast Negros

Brgy. Villamonte gin-uli ang P160,000 nga subsidy nga wala magamit para sa Electric MassKara

Matapos nga gindagdagan sang Bacolod City Legal Office sang demand to liquidate ang Barangay Villamonte may angut sa ila kontrobersyal nga electric float, nagpasa na sang liquidation ang Barangay.

Kaupod sini, ang 160,000 pesos nga suno sa Barangay, wala magamit gikan sa 300,000 pesos nga subsidy sang siudad para sa mga contingents sang Electric MassKara.

Ginsiling ni City Legal Officer Karol Joseph Chiu nga nahatag na sang Villamonte ang tanan nga mga resibo kag dokumento nga ginpangayo sang siudad, apang ipaidalum pa ini sa verification agud masiguro nga wala sang anomalya nga natabo sa pag gamit sang subsidy.

Sandig sa ila liquidation, ang 80,000 pesos kuntani nga budget para sa electric float sang Barangay, ang wala na matandog sang barangay. Ginbalik na sa City Treasurer's Office ang subsidy nga gin-uli sang Barangay Villamonte.

Magluwas sa ila, wala naman sang iban pa gid nga contingent ang nagbalik sang subsidy bangud nagamit na ini tanan.

Nangin kontrobersyal ang hitsura sang float sang Barangay Villamonte sang tinalikdan nga Electric MassKara. Halos wala ini sang suga nga nakatakod kag wala naman ini gintugutan sang organizers nga magparada bangud wala ini makapasar sa standards sang kompetisyon.

[sibwp_form id=1]
Exit mobile version