Ginpaidalom sa lockdown ang Barangay Montilla sa banwa sang Moises Padilla tubtob sa Mayo 10 sandig sa executive order nga gin papanaog ni Mayor Ella Garcia Yulo.
Sa pahayag sang banwa sa page sini, gin recommend sang Municipal Inter Agency Task Force ang lockdown bangud sang kakulang sang kooperasyon sang mga primary contacts sang mga nagpositibo sa COVID-19 nga nagtambong sa isa ka haya.
Nabudlayan ang contact tracing team sa pagkilala sang mga nagkadto sa amo nga haya.
As of April 26, 48 ang active cases sang Moises Padilla kag siyam diri ang gikan sa Barangay Montilla.
Sa mando sang alkalde dapat indi mag gwa sa barangay ang mga pumuluyo sini.
Wala man sang sarang anay nga makasulod sa barangay.
Mga prayer meeting, bible study kag mga kasubong nga hilikuton ang pwede nga mag padayon basta para lamang sa mga taga Barangay Montilla.
Ang bunyag, kasal kag lubong kinahanglan sang permiso.
Iga paidalom naman sa random swab testing ang mga pumuluyo.