Beterano nga fire volunteer kag mga negosyante kabahin sa mga ginpasidunggan sa Banwahanon Awards sang Bacolod.
Ang pagkabaganihan sang beterano nga fire volunteer nga si Bryant Lao ilabi na sa bahin sang pagluwas sang kabuhi sa mga nagaluntad nga sunog kabahin sa mga kabangdanan nga ginkilala siya bilang Banwahanon Awardee.
Kaupod niya nga ginpasidunggan ang negosyante nga sanday Marigold Ponce-Tangco nga ginpangunahan ang mga outreach activities sa Bacolod kaupod ang katapo sang Goldhearts Club kag si Nestor Aboy Evaristo nga nangin instrumental sa pagpasanyug sang food industry sa siudad.
Nalakip sa mga ginpasidunggan sa pagdumdom sang ika 86 nga charter anniversary sang siudad ang mga Be the Change Awardee nga sanday Dr. Edwin Segovia, isa ka school teacher sa Banago Elementary School nga ginapangunahan ang pagpanagtag sa libre nga school supplies kag learning materials sa mga estudyante, ang katapo sang Sagup Negros nga ginapabaskog ang food waste mitigation initative paagi sa pagkolekta sang mga ma-rescue pa nga supply sang utan kag kararuton nga pwede maluto kag mabaligya.
Nagbaton man kasubong nga award ang 4th year psychology student nga si Fairlly Pretta nga tigayon nga nabuligan kag napangitaan sang ilistaran ang isa ka senior citizen nga may anak nga may diperensya sa pamensaron.
Ginkilala man sang Bacolod LGU ang kontribusyon sang mga individual kag corporate taxpayers pati na an mga organization kag mga indibidual nga nagpalab-ot sang bulig sang ginkulang sang water supply ang siudad sang tig-ilinit.
Ginpahayag ni Mayor Albee Benitez nga sa handom sang siudad nga mangin isa ka supercity, ginakinahanglan ang mga superpersons kasubong sang mga awardees nga makahatag inspirasyon sa iban pa.