Paghatag atensyon sa ginahinyo sang larger stakeholders para sa ginaplano nga pag construct sang bag-o nga Burgos Market mas luyag paboran sang pamuno sang Committee on Market sang konseho.
Nahangpan ni Councilor Celia Flor ang ginahimo nga pagpamatuk sang pila ka mga market vendors sa plano nga pag-contruct sang bag-o nga Burgos Public Market.
Pero nagapati siya nga mas dapat man pamatian kag tagaan atensyon ang petisyon sang iban pa nga market vendors kag customers sang merkado nga luyag sang bag-o nga merkado.
Wala nagakasayuran suno sa iya nga final na ang mangin desisyon sang siudad bisan nagboto na ang pila ka mga vendors nga indi luyag sang construction sang new market.
Ginpahayag sadto ni Mayor Albee Benitez nga iya na lang ibalhin ang P525M nga pondo para Burgos Market para mapakaayo ang Libertad kag Central Market ukon gamiton ang pondo sa underground cabling system project.
Pero sang mahibaluan ang petisyon sang iban nga market vendors kag customers nagsiling ang alkalde nga posible i-consider niya ang ginahinyo sang ginakabig bigger stakeholders para sa plano para sa merkado.
Kadam-an sa mga opisyal sang market vendors association nagpamalabag sa ginaplano nga construction bag-o nga merkado sa kahangawa nga liwat nga maapektuhan ang ila palangabuhian.
Gani sa baylo ang pag-repair sang pasilidad ang ila ginahinyo para sa bag-o lang man nakaayo nga merkado.