Bayad Agad system ginlunsar sang Bacolod LGU agud mapadasig ang pagpalab-ot sang ayuda sa mga nahalitan sang kalamidad kag iban pa. Binulan kag kun kis-a nagakatuigan pa antes mabaton sang mga benepisyaryo ang ayuda gikan sa siudad. Luyag ni Mayor Albee Benitez nga mabag-o ini paagi sa ginlunsar nga Bayad Agad system. Sa pagpanguna sang Department of Social Services and Development tinutuyo sang programa nga insigida nga mapalab-ot ang mga medical kag financial assistance sa mga pasyente. Subong man ang mabuhinan ang kabudlayan sang mga nahalitan sang kalamidad pareho sang bagyo kag sunog.
Ginpasalig ni DSSD OIC Alma Gustilo nga kun kumpleto ang mga requirements sang mga aplikante nga benepisyaryo pwede gilayon ma-release ang pondo agud insigida nga mapalab-ot sa ila.
Ginatun-an naman sang siudad ang pag-gamit sang qr codes agud mas mapahapos kag mapadasig ang proseso sa pagpalab-ot sang LGU sang bulig sa nagakinahanglan.