Samtang naga banaag ang hitsura sang mga electric floats sang mga nagpakigbahin nga mga Barangay sa Electric MassKara sang Biyernes, amo naman sini ang hitsura sang float sang Barangay Villamonte sang mag-abot na ini sa venue.
Wala ini makapasar sa standard sang kompetisyon, gani wala na gintugutan sang organizers nga mag-upod pa ini sa parada.
Dismayado si Bacolod City Councilor Al Espino, sa natabo sa float sang Barangay Villamonte kun sa diin residente man siya.
Pagausisason na sang Sangguniang Panlungsod kun ngaa amo sadto ang natabo sa float sang Barangay Villamonte, apisar nga may 300,000 pesos man nga subsidy nga ginhatag sa tagsa ka barangay.
Suno kay Espino, ini palang ang labing una nga Electric MassKara nga may float nga ginpapuli bangud sa hitsura sini.
Sini nga adlaw, ginpatawag sang pamunuan ang sang Barangay Villamonte ang supplier kag designer sang float, apang sa karun wala pa magsabat sa Digicast Negros ang si Punong Barangay Rommel Flores.
Matapos ang tanan nga kompetisyon, ginamanduan na sang Sangguniang Panlungsod ang tagsa ka mga barangay nga nakakuha sang mga subsidy sa bisan ano nga mga kompetisyon sa ika 47 nga MassKara Festival nga magpasa na sang ila liquidation.
“First time e. Because indi gid ya amo. Even Barangays nga mas gamay pa sa Villamonte and perform and nag deliver despite of the constraints and considerations amo na ang aton ginalantaw. That is why gani nga nadismaya gid kita because that is my own barangay. Nadismaya kag daw na umol ka bala kun sin-o gid man ang responsable sina”, suno kay Espino.
[sibwp_form id=1]