Kasunod sang natabo nga pagkawasak sang dike sang waste water pond sang Universal Robina Corporation Bais Distillery sa Bais City Negros Oriental sang nag ligad nga semana napaidalom na sa state of calamity ang banwa sang Manjuyod kag Bais City sa Negros Oriental.
Ginsiling sang local government units sang Manjuyod kag Bais City nga amo ang apektado sang natabo nga waste water spill, pito ka coastal barangays sa Manjuyod ang apektado kag napulo naman sa Bais City.
Suno sa Environmental Management Bureau ukon EMB-Negros Island Region, yara na sa 3,000 ektariyas sang baybayon nga sakop sang Tañon Strait ang kontaminado.
Bangud sang sini nga insidente may nagluntad man nga fish kill sa baybayon.
Suno sa Department of Environment and Natural Resources, 255,000 cubic meters sang molasses waste water ang nagkadto sa Bais Bay sadtong Oct. 26 halin sa ethanol distillery nga ginalantaw threat sa marine life sa Tañon Strait nga ginakabig pinakamalapad nga protected marine area sa Pilipinas.
Sa statement sang URC ginsiling sang kumpanya nga masobra isa ka gatos ka tawo ang maga trabaho para makaayo ang naguba nga dike sa Nobyembre 4.
Mangingsida kag ang mga yara sa tourism industry ang lubos nga apektado kay indi pwede maka pangisda sa baybayon kag ginpauntat ang pagkadto sa sandbar sang turista pati na dolphin watching.