Tul-an sang menor de edad nga na anod sang flashflood sang bagyo Tino nasapwan sa Bago City

May mga tul-an na naman sang tawo nga na anod sang flash flood sadtong paglaslas ni Bagyo Tino sang tinalikdan nga tuig, ang nakit-an nga nakalubong sa duta sa kilid sang Maragandang River sa Purok Timawa, Barangay Ma-ao sa Bago City sang Martes.

Nadiskubrehan ang mga tul-an sang isa ka residente matapos niya makit-an ang ido nga may ginakutkot sa gamot sang puno sang kawayan sa kilid sang suba kag may ginataban nga tul-an.

Sang gin-usisa sang lalaki, iya nakit-an ang bagol kag iban pa nga tul-an sang tawo.

Nagpadulong sa lugar ang isa ka pamilya nga nadulaan sang himata sadtong paglaslas ni Bagyo Tino matapos maanod sang baha sang Nobyembre 4, 2025.

Paagi sa iya shorts, paha kag unto, positibo nga ginkilala ang biktima nga amo ang ila 13-anyos nga himata, isa ka Grade 8 student kag taga Purok Yellowbell sa Brgy. Binubuhan sa Bago City.

Gindala ang mga tul-an sa Baxter Funeral Homes kag iga-subject sa post mortem kag DNA cross matching examinations.*

[sibwp_form id=1]