Bangkay sang mangunguma nga na anod sa spillway sa Candoni nasapwan.
Nailo ang duha ka mga kabataan matapos maanod kag malumos ang ila amay sa spillway nga sakop sang Sitio Panacmalan, Barangay East sa banwa sang Candoni, Negros Occidental.
Gikan sa Poblacion kag magapauli na kuntani Domingo sang hapon, ang 40-anyos nga amay upod ang iya utod, apang kinahanglan nila nga magtabok sa spillway.
Sa imbestigasyon sang Candoni PNP, nagduha-duha ang utod sini apang ang lalaki ang nagtabok sa spillway.
Bangud sang mabaskog nga daludo sang tubig, naanod ang lalaki kag nalumos.
Nagpatigayon sang rescue operation ang otoridad kag matapos ang masobra 15 ka oras nga pagpangita, nakit-an kaina sang aga ang lawas sang lalaki.
Ginsiling ni Police Lt. Gilbert Alunan, deputy chief sang Candoni PNP, ang lugar kun diin nasapwan ang lawas sang lalaki ang may kalayuon nga duha tubtob tatlo ka kilometros halin sa spillway.
Suno kay Alunan, natabuan nga sang pagpauli sang biktima kag iya utod, nagalapaw ang tubig sa spillway bangud posible mabaskog ang ulan sa ibabaw nga bahin sang bukid.
[sibwp_form id=1]