Nagakaagnas na ang bangkay sang isa ka lalaki sang masapwan sa suba sa Hacienda Canla-on 1, Barangay Sag-ang sa banwa sang La Castellana, sang Huwebes.
Manguha kuntani sang utan ang isa ka residente sang iya makit-an ang lawas sang lalaki.
Ginsiling ni Major Melchor Patna-an, officer-in-charge sang La Castellana PNP, wala pa makilala ang nasapwan nga biktima.
Nakasuksok ang lalaki sang blue nga t-shirt, gray nga underwear kag maong nga shorts. Ginabulubanta 5 feet ang kataason sang lalaki.
May nakita man nga tattoo ang otoridad sa nawala nga abaga sang biktima. Ang disenyo – isa ka kandila kag may ngalan nga “Melvin.”
Sa inisyal nga pag-examine sa biktima, suno kay Patna-an, wala sang may nakita nga pilas sa lawas sini, apang gin-refer na sa SOCO ang pag-proseso sang scene kag sang bangkay agud mahibaluan gid ang gintunaan sang iya kamatayon.
Suno kay Patna-an, ginabulubanta apat tubtob lima na ka adlaw nga patay ang biktima antes siya ang nasapwan.
Posible man, suno kay Patna-an nga naanod lamang ang biktima sa area nga ginatawag sang mga pumuluyo nga “dam” bangud sang pila ka adlaw nga pagtupa sang mabaskog nga ulan sa La Castellana kag mga kaiping nga lugar.