Import clearance fee sa high fructose corn syrup ukon HFCS ginpasaka balik sang Sugar Regulatory Administration sa P30 kada sako.
Wala natalupangdan sang pamunuan sang Sugar Regulatory Administration nga napanubuan ang import clearance fee sa high fructose corn syrup ukon HFCS. Halin sa P30 kada bag sang HFCS sang 2017, nagnubo ini sa P1.50 per bag. Gani nagdesisyon ang Sugar Board suno kay SRA Administrator Luis Pablo Azcona nga ibalik ini sa P30 per bag paagi sa gin-issue nga Sugar Order No.4.
Ang HFCS ang masami ginagamit nga artificial sweeteners sang kadam-an nga beverage companies sa pungsod. Gindugang ni Azcona nga ang manubo nga import clearance fee ang nangin kabahin sa mga rason kun ngaa halos wala nagasaka ang demand sa domestic sugar. Nalakip sa ginaka-alarma sang katapo sang sugar industry ang pagsulod sang dugang nga sugar substitute ukon ginkabig other sugars sa pungsod. Tungod sini ginadihon na sang SRA ang pag-draft sang masunod nga sugar order sa tuyo nga mapangapinan ang mga sugar farmers sa mangin epekto sang dugang nga imported sugar products.