Isa ka balay sa Talisay City ang naguba matapos magluntad ang isa ka landslide. Nasamaran man ang isa ka bata bangud sang amo na insidente.
Sa report sang siudad sang Talisay, nagluntad ang landslide sa Sitio Panlucasan, Barangay Cabatangan mga las dies kaina sang aga.
Suno kay Provincial Disaster Management Program Division head, Zeaphard Caelian, naigo ang balay sang isa ka pamilya rason nga totally damaged ang ila nga puluy-an. Isa ka pamilya ang apektado kag isa ka bata ang nasamaran.
Sa report sang Talisay PIO ang walo kag tuig nga bata nga nag agum sang eye injury kag na admit kag gina bulong sa karon sa ospital.
Suno kay Dionela Madrona ang City Social Welfare Officer sang Talisay nahatagan na sang food packs ang pamilya kag sila karon ang temporaryo nga naga puyo sa ila nga himata.
May nagluntad man nga landslide suno sa PDMPD sa Diversion Road crossing Agustin sa Barangay Paraiso sa Sagay City. Ginpatigayon na ang clearing operation.