Ang pagtipon-tipon sang isa ka pamilya para ululupod magpanyaga ang nagresulta sa isa ka trahedya.
Ginarado sang isa ka truck ang ila nga balay nga nag resulta sa kamatayon sang isa ka iloy kag iya isa ka tuig nga anak samtang walo ang pilason.
Nadulaan sang preno ang isa ka truck kag nagdiretso sa isa ka balay kun diin nagatipon-tipon kag nagapanyaga ang magpamilya sa Purok Super L, Barangay Pandanon sa banwa sang Don Salvador Benedicto, Lunes sang udto.
Nawasak ang balay, patay ang iloy nga si “Judy”, 23-anyos kag ang iya bata nga si “JB”, naga-edad isa ka tuig kag napulo ka bulan…nalapakan siya sang truck.
Sa karon, duha pa ang nagapabilin nga kritikal nga kahimtangan sa ospital.
May anum pa gid ka mga pilason, lakip na ang duha ka mga menor de edad , pati na ang 58-anyos nga driver sang truck kag duha niya ka mga pasahero.
Ang sakay sang truck ang tanan residente sang Barangay Canlandog sa banwa sang Murcia.
Ginsiling ni Police Major Ellendie Rebusquillo, hepe sang DSB PNP, nagapadulhog ang truck sang gin alegar sang drayber naguba ang brake kag nadulaan sang control ang driver.
Suno sa hepe, nag-panic ang driver kag ginpatay sini ang makina agud kuntani nga magdulog ang truck apang ini pa ang gintunaan sang pagkabunggo sang truck sa balay tungod indi niya na malubag ang manibela.
“Subong ginahulat pa namon ang pamilya kay daw indi pa sila ka time, ka kwan sang panahon nila kay struggle pa sila paano nila i-cater ang ila nga himata nga nabiktima nga ara sa ospital kag ang mga napatay”, suno kay Rebusquillo.*
[sibwp_form id=1]