Siudad sang Bago sa karon ang naga pabaskog sang kampanya kontra dengue cases.
Ini sa tunga sang pagsaka sang dengue cases. Suno kay Elizabeth Nala-onan ang dengue coordinator sang siudad, as of February 11, may 127 ka dengue cases ang na record.
Sa report sang Provincial Health Office sadtong Pebrero 1, ang siudad sang Bago ang naka-record sang pinaka madamo nga dengue cases sa bilog nga probinsya.
Suno kay Nala-onan, ang Brgy Lag-asan sa 24 ka mga barangay sang Bago ang may pinaka madamo nga dengue case nga na report.
Ang bilog nga 24 nga barangay sang siudad may recorded dengue cases.
Suno kay Nala-onan mas gin pabaskog nila ang ila nga clean-up drive.
Sa mga pulong-pulong sa komunidad kag eskwelahan ila gina pahangup ang importansya sang matinlo nga palibot kag indi dapat pagtugutan ang pag tenir sang mga breeding places sang lamok nga sarang mabuhi sa stagnant kag bisan pa matinlo nga tubig.
Naga panagtag man sang mga balasahon angut sa dengue kag paano malikawan ini. Naga pang hatag kag nagapatubo man sila sang mga anti dengue mosquito plants.
Dugang pa niya, nagapatigayon man sila sang fumigation kag naga apply sang larvicide.
Gina duso man sang health officials ang gilayon nga pag pakonsulta sa duktor kun makitaan sang sintoma sang dengue kaangay sang pila ka adlaw nga pag hilanat, rashes kag pag palanakit sa kalawasan.
Damlag pa ginsiling sang PHO nga sa cycle sang dengue, sa kada tatlo ka tuig, nagasaka ang kaso kag ang 2025 ikatlo nga tuig humalin sang nagtimbuok man ang kaso.
“Number one gid for the community is to seek and destroy. Meaning kuhaon, pangitaon kag papason ang gina muaran sang lamok. As you know ang lamok naga muad siya sa clean and stagnant water, which is makita naton sa aton palibot. We need the cooperation of each of the household in Bago City also”, suno kay Nala-onan.