Isa na lang ka hearing kuntani ang kinahanglan agud maduso sa plenary ang House Bill 297 ukon ang re-districting bill nga gin-file ni Bacolod Representative Greg Gasataya sa kongreso.
Ugaling bangud na-appoint bilang DSWD Secretary ang anay chairman sang House Committee on Local Government nga si Rex Gatchalian, magahulat anay ang kongreso sang magatal-us sa iya nga amo ang magapadayon sang committee hearing para sa re-districting bill.
Suno kay Gasataya mahimo sa sini nga bulan matigayon ang hearing sa iya gin-refile nga hagna.
Tinutuyo sini nga matunga sa duha ka distrito ang Bacolod agud mas mapadasig ang pag uswag sang ekonomiya sang siudad.
Ginapaabot man sang kongresista nga maaprubahan ang HB 297 antes sang 2025 local elections.