Digicast Negros

Bacolod SP naghinyo sa alkalde nga magpangita sang available nga pondo para ipatukod sang ospital

Konseho sang Bacolod ang nagpasar sang resolusyon nga nagahinyo sa alkalde nga tun-an ang posibilidad sa paggamit sang available nga pondo sang siudad para sa pagpatukod sang kaugalingon sini nga ospital.

Nangin mainit ang pagtalakay sang mga katapo sang Sangguniang Panlungsod sa ila virtual session kahapon sa resolusyon nga gin-propose ni Councilor Wilson Gamboa Jr. nga nagahinyo kay Bacolod Mayor Evelio Leonardia nga gamiton ang available credit line sang siudad sa bangko sa pagpatukod sang ospital.

Ini bangud ang Corazon Locsin Montelibano Memorial Regional Hospital lamang karon ang naga isahanon nga public hospital nga ginakadtuan sang mga pumuluyo sang Bacolod.

Pero ginpahayag sang iban nga mga konsehal nga indi na mahimo nga tandugon ang credit line sang siudad sa mga bangko bangud napa-in na ini sa iban nga mga proyekto.

Gindugang pa sang mga konsehal nga may yara na karon sang pending bill sa kongreso si Bacolod Congressman Greg Gasataya nga nagatuyo sa pagtukod sang Bacolod City General Hospital.

Suno kay Gamboa, wala sang kasigurohan mahatagan sang pondo sang national government ang pagpatukod sang Bacolod City General Hospital amo kun ngaa mas maayo nga may mapa-in nga pondo ang siudad.

Dugang pa ni Gamboa nga mahimo man ini nga gamiton bilang counterpart sang siudad sa igatukod nga ospital base sa hagna ni Gasataya kun matigayon gid man ini.

Bangud sini, ang ginpasar nga resolusyon sang konseho amo ang paghinyo na lamang sa alkalde nga tun-an kun may yara sang available nga pondo ang siudad para sa pagpatukod sang isa ka ospital.

Exit mobile version
Skip to toolbar