Nagabaligya anay sang mani sa kilid sang Bacolod Public Plaza si Wilfredo Sultan sang Barangay 17. Tubtob nga nangin seaman ang iya anak kag nakabakal sila sang pick-up.
Wala sang lugar nga maparkingan ang ila salakyan amo nga ila ini gina bilin sa atubang lang sang ila balay nga yara man lang sa kilid dalan.
Si Marinduque representative Lord Allan Velasco nag file na sang House Bill 31 nga naga nagamando sa Land Transportation Office nga mag verify kun may garahe ang mga car owner antes pa man maaprobahan ang ila pagpa rehistro sang salakyan.
Ang hagna ang nagatuyo man nga mabuhinan ang kadamuon sang salakyan nga kabangdanan sang pag gutok man sang lakat sang trapiko.
Indi man malipod nga masami ang mga salakyan nga wala sang garahe ang naga serbe sablag sa alagyan.
May pagkabalaka sa amo nga hagna si Wilfredo bangud isa man sila sa mga nakabig informal settler sa barangay.
Ang mekaniko nga si Elly Santillana masami sa kilid man lang sang kalsada nagakaayo sang salakyan.
Bisan maapektuhan ang iya palangabuhian pabor siya nga dapat may garahe ang mga tag iya sang salakyan.
Ang Bacolod isa lang sa mga lugar nga na identify sang National Economic Development Authority ukon NEDA nga nagadamo na ang mga salakyan resulta nga apektado ang lakat sang trapiko.
Ang no parking ordinance isa lang sa mga natukod man nga pagsulundan agud mapahagan hagan ang pag gutok sang lakat sang trapiko ilabi na sa mga mayor nga dalanon.