Nagapangabay si Bacolod City Councilor Dindo Ramos, pamuno sang Committee on Transportation and Traffic sang Sanguniang Panlungsod sa LTFRB nga tumanon ang ila mga gin promisa sa transport sector sa siudad, sa pihak sang pag suspend sang Ombudsman kay Atty. Vigor Mendoza bilang LTFRB Chairman.
Suno sa konsehal isa ka dako nga pagpanghangkat sa transport sector amo ang masami wala matapos nga mga programa sang mga nagapungko bilang chairman sang ahensya.
Iya ginsiling nga ang promisa sang isa ka chairman ang kinahanglan tumanon sang ahensya, apisar nga may pagbaylo na sa pamunuan.
Sang Agosto 12 nagpadulong sa Bacolod City si Mendoza kag nagpakighinun-anon sa modernized kag traditional jeepney drivers kag operators.
Isa sa iya mga ginpromisa amo ang pagpaiway anay sang mga bangko sa pagbutong sang masobra 300 ka modernized jeep nga nagabyahe sa siudad.
Nagpasalig man ini sang financial assistance sa modernized jeepney operators kag traditional jeepney drivers.
Anum ka adlaw matapos ang iya pagbisita sa siudad, ginsuspende sang Ombudsman si Mendoza bangud sa gina alegar irregularidad sa iya pagdumala bilang pamuno sang Land Transportation Office antes ini nagpungko bilang chairman sang LTFRB.
Sa karun nagapabilin nga on-hold ang foreclosure sang mga modernized jeepney units nga wala makabayad sang ila monthly amortization sa bangko.
“We will not talk about personality kun sin-o da gapungko. Ang commitment is not the commitment of the chairman but the commitment of the office. During the time nga nagmeeting kita, ara man ang mga regional directors, in fact ara man si Director Llena kag Director Osmeña sang region 6 kag NIR. Kun ano nga ginhatag nga assurance ni chairman Mendoza nabatian man to nila kag hopefully ang ina siya ila ma implementar”, suno kay Ramos.
[sibwp_form id=1]