Nagsugod na sa pagpangdakup ang Bacolod Transportation and Traffic Management Department upod ang City Legal Office sang mga may open-pipe ukon magahod nga tambutso sang mga motorsiklo sa dalanon sang siudad.
Ini bilang pagpatuman sang City Ordinance 356 nga naga-regulate sang noise pollution sa Bacolod.
May walo na ka mga motorista nga una nga nasampolan.
Nagagamit ang traffic personnel sang sound meter agud mahibaluan kun tuman na kagahod sang tambutso sang mga motorsiklo.
Suno kay Atty. Reuben Sabig, Officer-In-Charge sang BTTMD, 10 metros ang distansya sang sound meter sa motorsiklo. Indi dapat maglapaw sa 90 decibels ang katunog sang tambutso.
Magabayad ang violator sang P500 sa first offense, P2,000 naman sa 2nd offense kag P3,000 sa 3rd offense.
Magluwas sa multa, pagakumpiskaron man ang mga open-pipe mufflers.