Ginasugudan na sang Bacolod City Disaster Risk Reduction and Management Office ang pagplastar sang community-based flood early warning systems, isa ka systema nga magatako sang water level kag kadamuon sang ulan agud mapadasig ang pagpa alerto sa publiko sa tion sang kalamidad.
Sang Oktubre 22, ginpaidalum na sa orientation ang DRRMO may angut sa amo nga sistema. Ginsiling ni Dr. Anna Maria Laarni Pornan, pamuno sang DRRMO, 26 million pesos ang balor sang mga equipment nga ginbakal sang siudad para sa amo nga proyekto, apang ila pa ginahulat nga mag abot sini nga tuig ang mga equipment.
May equipment nga sarang mag takos sang water level sang mga suba, may yara man sang rain gauge nga nagatakos sang kadamuon sang ulan, kag may ara pagid weather stations nga nagatakos naman sang air quality kag temperature.
Igatakod ang mga ini sa 19 ka mga lugar nga na identify sang DRRMO lakip na ang mga suba kag creek nga masami nagaawas kun magbunok ang ulan.
Tanan nga equipment ang naka connect naman sa headquarters sang DRRMO. Kun magsaka na sa emergency alarm ang lebel san tubig sandig sa pagtakos sang early warning device, patunugon naman sang DRRMO ang 130 decibels nga mga sirena bilang patimaan nga kinahanglan na mag evacuate sang mga residente malapit sa mga suba.
Ginapaabot nga mahuman na ang proyekto sa sulod sang anum ka bulan.
[sibwp_form id=1]