May pagdamo gid man sa karon sang kaso sang trangkaso.
Ini bangud sang matugnaw nga panahon. Kun bulan abe sang Enero, peak sang hangin nga Amihan diri sa Pilipinas gani matugnaw ang dapya sang hangin, ilabi na kun gab-i kag kaagahon.
Suno sa kay Dr. Grace Tan, ang pamuno sang Environmental Sanitation Division sang City Health Office, isa ini ka sahi sang influenza pero kun ano nga sahi sang virus ang naga tuga sini, indi pa mahibaluan.
Suno kay Tan indi man abe ang tanan nga gina trangkaso ang naga pa konsulta.
May gina tawag nga seasonal influenza ukon ang seasonal flu, isa ka acute respiratory infection tuga sang influenza virus kag yara lang sa palibot.
Ini ang mahimo magresulta sa paglain sang pamatyag sang pasyente pwede mild lang ukon severe. Kag mahimo man magresulta sa pagka ospital bisan pa gani kamatayon.
Kag ang ini nga kaso ang may pagdamo sa karon sa bilog nga kalibutan sa nagliligad nga binulan.
Sintomas sini amo ang paghilanat, ubo, sakit sang ulo, palanakit sang lawas, palangluya kag sore throat kag runny nose.
Para indi makapang laton ukon malatnan, mahimo magtabon sang baba kun naga ubo, mag practice ang proper handwashing. Kun naga lain ang pamatyag indi na makig kita sa iban nga mga tawo kag mag mask.
Likawan ang pag uyat sang mata, ilong kag baba kun wala makapanghinaw.
I-maintain ang 6-8 hours nga tulog, mag inum sang tubig kag proper nutrition. Regular man nga tinluan ang mga areas nga masami ginatapikan sang virus. Kun maglain na gid ang pamatyag, mag konsulta na sa duktor.*