Manager sang Bacolod City Water District ang ginkakas sa pwesto, pero ang natungdan indi magbiya sa iya nga pwesto.
Para kay BACIWA Manager Mona Dia Jardin, ang board resolution nga ginpapanaog sadtong August 22, nga naga deklara sang expiration sang iya nga term of office bangud sang loss of trust and confidence ang null and void kag wala sang basehan morally ukon sa laye man.
Ini base sa sulat nga iya ginpadala sang Bieyernes sang hapon kay BACIWA board chairperson Sonya Verdeflor, Vice Chairperson Edgardo Uychiat kag Corporate Secretary Clarissa Araneta.
Dugang pa ni Jardin, dapat may formal complaint, may notice of hearing kag formal investigation kay ang resolution lamang indi maka kakas sa isa ka public officer kaangay niya nga may pag pangapin sang Civil Service Laws.
Luyag niya ang formal investigation nga patigayunon sang Office of the Government Corporate Counsel matapos makabaton sang formal complaint gikan sa natungdan nga katapo sang BACIWA board.
Suno kay Verdeflor ang sulat ni Jardin ang ila na nga na forward sa Local Water Utilities Administration ukon LWUA para sa ila nga investigation kag assistance.
Ang LWUA ang talatapan nga naga regulate sang tanan nga mga water district. Nalakip sa gin-forward sa LWUA ang board resolution nga naga appoint kay Engr Michael Soliva bilang acting general manager kasubong man ang resolution sa Land Bank of the Philippines Development Bank of the Philippines kag iban pa gid nga banko nga may BACIWA account nga may yara sang pag kambyo sa signatories gikan kay Jardin padulong kay Soliva.
Sa resolution, nakasaad nga pila sa basehan sang loss of trust and confidence amo nga si Jardin ang signatory sa Joint Venture Agreement sang BACIWA kag PrimeWater Infrastructure Corporation.
Wala man lang naka patuman sang sanction ukon nag kolekta sang penalties si Jardin gikan sa PrimeWater apesar sang deficiency kag non compliance sang PrimeWAter sa ila nga obligasyon.
Dugang pa diri nga ang mga nakakas nga empleyado sang BACIWA bangud sang JVA ang wala nabayaran sang ila nga backwages nga nagresulta sa nagkalain-lain nga mga kaso batuk sa BACIWA.
Na cite pa gid kun paano ni Jardin gin handle ang pagbakal sang 2 hectare property para sa BACIWA Eco-park sa Brgy Alangilan.
“Imbestigahon siya namon? Ngaa imbestigar kami? Indi kami ang proper body to investigate, it must be a certain body – audit. Actually may pending kami nga request sa LWUA, kag sa LWUA mapa audit kami, post audit na ya ang COA. Ang amon ya because there’s a new set of officers mapa audit kami sa LWUA and then na ready na to sang LWUA nga i-schedule na, comes ang iya ni President Marcos nga directive nga ipa investigate ang tanan nga water district ang ila JVA with PrimeWater”, suno kay Verdeflor.
Suno kay Jardin sa nagakaigo nga tion maga pa interview siya sa media.