May ginlikawan nga motor ang truck nga may karga sang tubo apang wala gilayon mabalik sang driver ang manibela rason nga nabunggo sa kasugata nga motor sang duha ka mga babaye sa JY Perez, Barangay Talubangi sa Kabankalan City, mga las 3:35 sang hapon, Huwebes, Nobyembre 5.
Nagresulta ang insidente sa pagtaliwan sang 24-anyos nga driver sang motor, taga Brgy. Andulauan sa Ilog, Negros Occidental, kag pagkasamad sang angkas sini nga babaye.
Magluwas sa motor sang duha ka mga babaye, nagdiretso kag nabunggoan man sang truck ang isa ka tricycle nga naga-park sa higad sang dalan.
Nagapadulong sa sentral sa Kabankalan ang truck agod mag-ula kag magpagaling sang tubo.
Nagpangayo sang pasaylo ang 19-anyos nga driver sang truck sa pamilya sang duha ka mga babaye tungod indi niya man gusto ang natabo. Siya karon ang detained sa custodial facility sang Kabankalan PNP.
Ginsiling ni Police Lt. Col. John Ganzon, hepe sang Kabankalan PNP nga suno sa pamilya sang backrider, istable na ang iya kondisyon sa ospital.
[sibwp_form id=1]