Patay ang isa ka ginakabig sang PNP nga drug personality matapos gintiro sa Islamic, Barangay 5, San Carlos City, kagab-i.
Ginkilala ang biktima kay Ma. Regina Bascones, alyas “Gina”, 38-anyos. Samtang, ang suspek naman ang ginkilala lamang kay alyas “Bobby”.
Sa insiyal nga imbestigasyon sang San Carlos City Police Station, ginsaysay sang saksi nga nakabati siya sang duha ka lupok sang pusil sang natabo ang insidente. Iya na lang nakita ang biktima nga nagahigda sa dalan sang iskinita kag may yara ini sang igo sang bala sa nagkalain-lain nga bahin sang iya nga lawas. Gilayon nga gindala sa ospital ang biktima apang gindeklarar nga dead-on-arrival sang attending physician.
Nakapalagyo naman ang suspek.
Na-rekover naman sa crime scene ang isa ka basiyo sang bala sang calibre 45, 1 ka slug sang sang calibre 45, isa ka cellphone kag powerbank.
Padayon naman ang imbestigasyon sang mga kapulisan agud mahibaluan ang motibo sa krimen kag madakpan ang suspek.