Indi lang ang mga anay kadre ukon katapo sang New People’s Army ang nagpat-ud angut sa ginahimo nga recruitment sang rebelde kag mga support organization sini sa mga eskwelahan ilabi na sa mga kolehiyo kag unibersidad.
Sa pagsinapol sang army kag PNP upod sa katapo sang End Local Communist Armed Conflict Task Force, ginpabutyag man sang pamunuan sang pila ka mga kolehiyo sa Bacolod ang nagapadayon nga paghaylo sang mga estudyante sa pagtambong sa mga meetings sang mga students organizations nga wala ginakilala sang buluthuan.
Suno kay 303rd Infantry Brigade Commander Brigadier General Orlando Edralin, ini man ang kabangdanan nga ginahaylo nila ang pamunuan sang mga kolehiyo kag unibersidad nga suportahan ang tikang sang ELCAC angut sa kampanya kontra sa insurgency problems agud man mapaiway ang recruitment sang rebelde sa mga eskwelahan.
Nagpasalig naman ang pamunuan sang Commission on higher education sa Western Visayas nga tagaan atensyon ang maid-id nga pagpangusisa sa mga student affairs organization nga mahimo gamiton sang rebelde kag sang ginakabig sini nga legal front.
Suportado naman sang Bacolod LGU ang tikang sang army kag pnp ilabi na nga gindeklarar sang Regional Joint Peace and Security Coordinating Center bilang insurgency free ang siudad.