Ginkumpirma sang militar nga upod sang napatay nga npa leader nga si Kerima Tariman nga ginpadala sa Negros para magbulig sa pwersa sang rebelde ang iya nga bana nga si Emmanuel Acosta.
Suno sa pamuno sang 303rd Brigade sang philippine army nga si Brigadier General Inocencio Pasaporte, sa ila nga impormasyon mga duha na ka tuig nga yara sa Negros ang duha.
Ang 42 anyos nga si Tariman ang suno sa army lider sang Northern Negros Front kag ang iya naman nga bana ginakabig nga mataas nga opisyal sang Komiteng Rehiyonal Negros-Cebu-Bohol-Siquijor.
Suno kay Pasaporte, ang pag import sang kadre, ukon ang pagpadala sang central command sang NPA sang ila nga mga kadre sa Negros mahimo nagakasayuran nga naghuyang na ang lokal nga pwersa ukon wala sang pagsalig ang mataas nga pamunuan sa effort ukon trabaho sang local leaders.
Sa panan-aw ni Pasaporte, nag stagnate ang lokal nga liderato. Ang pagtaliwan ni tariman nga suno sa militar kilala man bilang si Ella kag alias Em-Em ang nag apekto sa timetable sang recovery sang lokal nga pwersa, labi na nga ang northen Negros ang ginakabig nga source sang logistical support.
Si Tariman, kag isa pa gid ka ginapatihan NPA kag isa man ka soldado ang napatay sa encounter sa tunga sang rebeldeng grupo kag 79th Infantry Battalion sa Hacienda Raymunda sa Brgy Kapitan Ramon sa Silay sang Agosto 21.