Anum ka mga teams gikan sa NEPC magabulig sa Ceneco para mapahagan-hagan ang pagluntad sang brownout karon nga tig-ilinit. Ginsiling ni CENECO acting general manager Atty. Arnel Lapore nga kabahin sa mga kabangdanan sang sunod-sunod nga brownout halin sang nagligad nga bulan amo ang pagkalalunay kag pagka-utod sang ila mga linya sang kuryente nga apektado sang mainit nga panahon.
Gani agud nga mabuligan ang distribution utility, magapadala sang anum ka mga maintenance teams ang Negros Electric Power Corporation nga sarang ma-dispatch sa mga lugar nga may brownout.
Ang team ang magabulig sa pag survey kag pag repair sang mga distribution line sang CENECO nga may diperensya.
Ginpaathag ni Lapore nga sa pihak sang pag brownout nagasaka ang bill sang mga kunsomedor epekto sang mataas nga consumption kag pagsaka sang bili sang kuryente karon nga tig ilinit.
Nagalaum sanday Mayor Albee Benitez kag Congressman Francisco Benitez nga sa labing madali nga panahon matigayon na ma aprobahan sang senado ang franchise application sang NEPC agud matigayon na ang pag-improve sang serbisyo paagi sa natukod nga joint venture agreement upod sa CENECO kag Primelectric Holdings Incorporated.
Ginapaabot nila ang pag gamit sang NEPC sang renewable energy sa tuyo nga mapanubo ang bili sang kuryente.