Estudyante pa lang si Ma. Celeste Del Castillo, hilig niya na ang magkaon sang tacos, isa ka Mexican food. Ugaling indi siya na namian sang taco shell kay kabudlay kan-on kag hiligkuon. Gani nag ayo siya sa iya iloy nga si Rossana nga maghimo sang empanada pero ang unod, fillings sang taco.
May cabbage, karne kag cheese nga fillings… Ang mga main ingredients sa paghimo sang tacos.
Didto nagsugod ang Sana’s Empanada ukon ang gina tawag nga Taco Empanada sa Barrio Maao.
Natilawan sang ila mga himata kag bisita kag nangin instant nga paborito. Ginlibod ini sang ila amay kag pati sila nagbulig man sa pag baligya sang Sana’s Empanada. Pati si anay cong. Charlie Cojuangco isa mga suki nila sadto, may gina himo lang sila nga extra spicy empanada para sa iya.
Pati ang tourism office sang Bago ang nagkilala naman sang ila produkto nga isa sa mga gina pabugal nga produkto sang siudad.
Subong ang Xias Cafe nga gina panag-iyahan sang iya nga utod amo ang naga serve sang ila nga empanada. May ara sa Barangay Maao kag may ara man sa Bantayan Park sang Bago.
Kag nakahibalo kamo bala nga kada adlaw makapaubos sila sang kwatro siyentos tubtob kinyentos ka mga empanada? Plano nila nga maka pwesto sa Bacolod City para mas madamo pa gid ang maka tilaw sa ila nga family recipe nga karon nangin paborito na sang ila nga barangay.