Gin-aresto sa Timor Leste si Anay Negros Oriental 3rd District Representative Arnolfo Teves, Jr.
Una na nga gin-announce sa social media sang iya anak nga si Axl nga gin-kidnap ang iya nga amay.
Ginsiling naman sang abogado ni Teves nga si Atty Ferdinand Topacio, nga gindakup sang immigration police si Teves sa iya puluy-an sa Dili mga las 8 sang gab-i sa oras sang Timor-Leste.
Upod man nga gindakup ang iya nga legal counsel sa Timor Leste nga si Dr Joao Serra.
Sa karon sila ang yara sa custody sang Ministry of the Interior.
Suno kay Topacio wala sang dokumento ukon may ginpakita nga arrest warrant ang otoridad nga naga paathag sang basehan sang ila nga detention.
Ginsiling naman sang Department of Justice sang pungsod Pilipinas nga hulaton nila ang masunod nga tikang sang Timor-Leste – ini kun ipa deport si Teves bilang isa ka undocumented foreigner, ukon i-extradite siya kasunod man sang application sang pungsod.
Wala pa sila as of press time may nabaton nga dokumento angut sa pag ka aresto kay Teves.
Nagapangatubang si Teves sang patong patong nga kaso may kaangtanan sa pag kapatay ni anay Negros Oriental Governor Roel Degamo kag siyam ka iban pa sang Marso 2023.
Ginsiling naman ni Mayor Janice Degamo ang balo ni anay Governor Degamo nga gina paabot niya ang pag atubangay nila ni Teves sa korte agudto tigayon na nga mahatagan sang hustisya ang natabo sa iya nga bana kag para man sa kalinong sang Negros Oriental.