Nag assume na sa ila nga pwesto kag katungdanan ang mga nagdalaug sa May 9, 2022 elections.
Sa Silay City, antes pa man nag panaog sa iya nga pwesto, nagpasalamat si anay Mayor Mark Golez sa mga Silaynon sa higayon nga siya ang makapangalagad sa ila sa sulod sang duha ka termino.
Suno kay Golez wala labot sa local kag national awards nga nabaton sang siudad sang iya nga tion, madamo sang job opportunities nga natangyag sini, mga infrastructure projects, pagnubo sang crime volume kag pagdamo man sang negosyo sa siudad.
si Joedith Gallego nga sadto nagserbe man bilang bise alkalde sa karon ang bag-o nga alkalde sang Silay City.
Sa Kabankalan City naman, nangin emosyonal ang ulihi nga flag rasing ceremony nga gintambungan ni anay mayor Pedro Zayco kag Vice Mayor Raul rivera.
Antes mag panaog sa pwesto ginhatagan sang mga empleyado sang siudad si Zayco sang tribute angut sa hinimuan sini sa pag sanyog sang Kabankalan.
30 ka tuig man nga nag pungko sa pwesto ang mga Zayco.
Nalakip sa idalom sang Zayco Administration ang pag convert sini gikan sa banwa padulong sa siudad, pagtukod sang mga infrastructure project – pagtukod sang city hall, domestic airport, farm to market roads, tourism roads, mga taytay kag ang pag establish sa Kabankalan bilang economic hub sa Southern Negros. Damlag pa, nag pasalamat na si Zayco sa mga pumuluyo sa suporta nga ginhatag kag nag panawagan sang pag buylog para sa bag-o nga administrasyon.
Bag-o nga Mayor karon sang Kabankalan City ang anay barangay kagawad nga si Benjie Miranda.
Sanday Golez kag Zayco ang nag pangalagad sang duha ka termino.