Ginpatay sang wala pa makilal-an nga mga suspek ang anay barangay captain sa Sitio Tunga, Barangay Patun-an sa banwa sang Calatrava, sadtong Lunes sang hapon.
Naka agum sang igo sang bala sa iya hawak ang 63-anyos nga si Alexander Apurado, residente sang nasambit nga barangay.
Base sa imbestigasyon sang Calatrava PNP, nagasakay sa Kawasaki Bajaj nga motorsiklo ang biktima pakadto sa iya balay sang siya ang gintiro kag natumba sa dalan.
Ginsiling ni Police Captain Jesus Alba, hepe sang Calatrava PNP, nagsakay sa motorsiklo ang duha ka mga suspek kag nagpalagyo.
Sa pag-backtracking sang CCTV cameras malapit sa lugar, suno kay Alba, nakakuha sila sang video sang mga suspek apang wala pa sang identity ang duha.
Padayon ang imbestigasyon sang Calatrava PNP sa motibo sang pagpatay sa anay barangay kapitan.