Gindakup sang kapulisan ang 30-anyos nga babaye matapos ginserbehan sang warrant of arrest sa kaso nga Qualified Theft sa Barangay Cabug, sa Bacolod, sang Miyerkules.
Ginsiling ni Police Captain Glenn Montaño, hepe sang Bacolod Station 5, nakabutang sa database sang ila e-warrant nga may yara ang akusado sang record nga 31 ka pending nga arrest warrants para sa kaso nga Qualified Theft.
May angut ang kaso sa nalastra sang suspek nga kwarta sang ila kompaniya.
Naga-obra bilang accountant ang akusado sa isa ka kompaniya nga naga-serbe bilang virtual distributor sang mga produkto sang kilala nga mga brands sang shampoo, habon, kag iban pa.
Suno sa akusado, nalingaw siya sang taya sa mga online games, ilabi na ang online sabong.
May P40,000 nga piyansa ang kada count sang Qualified Theft niya nga kaso.
Agud temporaryo nga makagwa, kinahanglan bayaran sang akusado ang kabilugan nga P1,240,000 bailbond para sa 31 counts sang Qualified Theft charges batuk sa iya.
Detained karon sa custodial facility sang Station 10 ang akusado kag nagahulat na lamang ang kapulisan sang iya commitment order antes siya isaylo sa pasilidad sang Bureau of Jail Management and Penology.