Ginreklamo sang mga netizens ang 911 matapos nga masobra makatlo ini ka beses nga wala nagsabat sa emergency call sang Sabado sang kaagahon kun sa diin ipakuha tani sa ambulansya ang duha ka mga lalaki nga nagbungguanay ang motorsiklo sa dalan San Juan sa Bacolod City.
Ginklaro ni Bacolod City Disaster Risk Reduction and Management Office Head Dr. Anna Maria Laarni Pornan, nga sang tion nga nagtawag ang mga saksi sang insidente sa 911, nakaresponde na sa iban nga lugar ang duha ka naka standby nga ambulance sang DRRMO.
Dugang pa niya, sang nasabat na ang tawag, gintinguhaan man nila nga ma-contact ang mga pinakamalapit nga ambulansya sa area, apang naga responde man halos tanan sa iban nga mga insidente.
Bangud sini, halos isa ka oras pa nga nagahiligdaon sa dalan ang mga biktima antes makaabot ang ambulansya.
Suno kay Pornan, operational ang 911 apang kun Globe ang gamit nga sim card sang nagatawag, indi ini mabaton sang localized 911 sang Bacolod City kag maga deritso sa national headquarters ang amo nga tawag.
Sa record sang DRMMO, may 261 sila ka mga tawag nga gakabatonan kada adlaw, apang halos 50 diri mga prank calls.
Ini ang isa man sa rason suno sa iya nga indi masabat gilayon ang iban nga mga emergency calls bangud congested ang hotline.
Apisar sini, ginpasiguro ni Bacolod City Mayor Greg Gasataya nga handa ang localized 911 nga magtatap kag mag responde sa mga emerhensya, ilabi na sa nagahilapit nga highlights sang MassKara Festival.
Nagapangabay man ang siudad sa publiko nga indi paghampangan ang pagtawag sa 911. Sarang man mapasakaan sang kaso kag ma block ang numero nga naga prank call sa 911.
[sibwp_form id=1]