Siyam ka landowners handa mag-donate kag magbaligya sang propiedad para sa road concreting and drainage project sa Cabug-Handumanan Road sa Bacolod City.
Binulan na nga apektado ang lakat sang trapiko sa Cabug-Handumanan road humalin sang nagkalaguba na ang sementado nga alagyan.
Masako naman ang ginahimo nga repair sang katapo sang City Engineer’s Office sa alagyan samtang padayon ang negosasyon sang Bacolod LGU sa mga pribado nga landowners agud nga matigayon ini nga mapasemento.
Suno kay City Engineer Loben Ceballos, may siyam na ka mga landowners nga handa mag-donate kag magbaligya sang portion sang ila propiedad para masuguran na ang road kag drainage construction project.
May P85M ang gintalana nga pondo sang siudad para masolusyonan na ang malawig nga problema sang mga motorista ilabi na sang mga residente sang Barangay Handumanan kag Cabug.
Gina-abi abi naman sang siudad ang suporta sang mga landowners ilabi na mga developers sang malapit nga mga subdivision nga handa magbulig sa pagpasemento sang alagyan.