Makita sa video ang pagbulig sang isa ka nurse nga nakalabay sa area kun sa diin nag lapaw ang van sa national highway nga sakop sang Purok Talos sa Barangay Igmaya-an, banwa sang Don Salvador Benedicto, Martes sang hapon.
Suno sa video uploader, papauli na sila sang ila malabyan ang van. Samtang naga hulat sa rescuer, wala nagduha-duha nga magbulig ang iya abyan nga si Crescian Jade Diamante Requiña, isa ka nurse nga naka-base sa Saudi Arabia.
Nag-gwa sa imbestigasyon nga gikan sa family outing ang mga sakay sang van kag padulong sa Bacolod City. Paglab-ot sang van sa blind curve sang Talos Road, nag-malfunction ang brake sang salakyan, rason nga nag-swerve ang van sa pihak nga lane kag naglapaw sa pil-as.
Sakay sang van ang 60-anyos nga driver kag 17 ka mga pasahero, walo diri sa ila mga menor de edad.
Ang driver, upod ang iya pamilya kag mga paryente ang gikan sa isa ka resort sa Barangay Bunga, DSB bangud ila gin-celebrate ang 60th birthday sang driver.
Walo ang nakaangkon sang mga pilas kag gindala sa ospital.*