Bangod sang pag-inulan sa nagligad nga semana, nagadako ang litik sa duta sa Sitio Manaol Barangay Quintin Remo gani gina lantaw ang posibilidad nga may matabo nga landslide kung magpadayon pa gid ang pag inulan.
Gani onse na ka mga pamilya ukon 64 ka mga persona ang nag evacuation sa evacuation center sang banwa.
Sila ang direkta nga maapektuhan kung mag landslide sa amo nga bahin sang Sitio Manaol.
Para mapa athagan kag matagaan sang mas maayo nga paathag nag request si Mayor Ella Garcia Yulo sa Department of Science and Technology nga kun pwede makapadala sa banwa sang team sang geologists para maka inspeksyon kag maka hatag man sang rekomendasyon sa LGU.
Gin abisuhan na ang mga pumuluyo nga magtinir anay sa balay sang ila mga paryente nga malayo sa nasambit nga danger zone.
Ang mga wala naman sang may masayluhan, pwede magtinir anay sa Evacuation Center sang banwa.
Ang lokal nga panguluhan mahatag sang libre nga transportasyon sa mga pumuluyo nga apektado kung may mga importante nga kuluhaon sa ila nga balay.
Suno alkalde, kinhaanglan i-isolate ang lugar para sa safety sang mga pumuluyo.