Suporta sang Lakas – CMD sa iya kandidatura sa kinto distrito ang labing gina pasalamatan ni Congressman Dino Yulo.
Sa interview sang media kay Yulo iya ginapasalamatan ang directorate sang Lakas CMD lakip na si Congressman Stephen Paduano sa pag tib-ong sang iya nga kandidatura.
Nalakip sa mga kaalyado niya nga mayor sa 5th District amo sanday Ella Garcia-Yulo sang Moises Padilla, Rhummyla Nicor-Mangilimutan sang La Castellana kag Nadie Arceo sang Hinigaran.
Pero iya man ginsiling nga ang labing importante nga endorsement ang maga gikan sa mga pumuluyo kag ini ang matabo sa adlaw sang piniliay.
Ginsiling ni Paduano nga sang Martes sa national meeting sang Lakas yara man nagtambong si Yulo, pagpakita man sang suporta sang partido sa iya.
Lakip sa mga nagtambong sa national party meeting sanday Vice Mayor El Cid Familiaran nga mayoral candidate sa Bacolod, Atty Rowena Lizares, mayoral candidate sang Talisay, re-electionist nga si Mayor Salvador Escalante, Jr., sang Cadiz kag Mark Golez – mayoral candidate sang Silay.
Samtang, iban nga mayoral candidates nga katapo sang Lakas suno kay Paduano ang naga lakip kay SB Añejo Nicor sang La Castellana kag Miguel Angelo Yulo sang Isabela.
Si Yulo ang paga bungguon ni Board Member Anton Occeno sang Partido Federal ng Pilipinas. Damlag pa dala sang alyansa sang Nationalist People’s Coalition gintib-ong na ni Governor Eugenio Jose Lacson si Occeno, bagay nga gina suportahan man ni Bacolod Mayor Albee Benitez.
“Of course no sin-o be indi gusto no. Pero ang pinaka importante nga endorsement naton maga halin sa pumuluyo labi na gid sa Mayo 12 kay te ina ya sa pag pati naton nakit-an na na sang pumuluyo naton kun sin-o ang mangin karapat-dapat nga congressman”, suno kay Yulo.